Ҳашишро дар дохили фатир ба муассисаи ислоҳӣ интиқол доданд

ДУШАНБЕ, 15.02.2017 /АМИТ «Ховар»/. Cуди ноҳияи Исмоили Сомонии шаҳри Душанбе парвандаи ҷиноятиро нисбат ба Галуев Зайниддин Ҷумахонович, соли таваллудаш 1983, зодаи ноҳияи Фархор бо айбдорӣ бо моддаи 200, қисми 3 бандҳои «а,д» ва Ғаниев Дарёдил Имомҷонович, соли таваллудаш 1988, зодаи ноҳияи Бохтар бо моддаи 32 қисми 3-201 қисми 3 бандҳои «в,д»-и Кодекси ҷиноятии Ҷумҳурии Тоҷикистон баррасӣ намуд.
Айбдоршавандаҳо қаблан суд шуда бошанд ҳам, ба хулосаи зарурӣ наомада, боз даст ба ҷиноят задаанд.
Д.Ғаниев охирҳои моҳи ноябри соли 2015 аз муассисаи ислоҳии ЯС 3/1 Сарраёсати иҷрои ҷазои ҷиноятӣ ба шаҳрванд Зайниддин Галуев, ки қаблан дар муассисаи ислоҳии мазкур якҷоя адои ҷазо менамуданд, ба воситаи телефон хоҳиш намудааст, ки ба муассисаи ислоҳӣ воситаи нашъадори навъи «Ҳашиш» -ро барои истеъмол интиқол диҳад.
Бо супориши Д.Ғаниев ҳамсараш ба ноҳияи Фархор ба назди З.Галуев рафта, як халтаи полиэтилении рангаш сиёҳи печонидашударо гирифта, ба ноҳияи Ёвон бармегардад. Аз дохили он 9 адад бастаро бароварда, онҳоро бо дока печонида, дар дохили хамир ҷой карда, ду дона фатири хонагӣ пухта, бо либосҳои зимистонаи шавҳараш дастовез намудааст.
Сипас ба воситаи ронандаи мошини мусофиркаши Ёвон — Душанбе Қурбонов Ризошоҳ Зувайдович ба шаҳри Душанбе равон кардааст, ки дар маҳаллаи 46- и пойтахт онро хешовандони маҳкумшудаи дигар гирифта, ба утоқи қабули дастовезҳои муассисаи ислоҳии ЯС 3/1 СРИҶҶ ВА Ҷумҳурии Тоҷикистон бурда месупоранд. Ҳангоми аз назар гузаронидани дастовез аз ҷониби кормандони муассисаи ислоҳӣ аз дохили ду фатир маводи нашъадори навъи ҳашиш, ки мебоист ба маҳкумшуда Д.Ғаниев дастрас мешуд, дарёфт ва мусодира гардиданд.
Бо ҳукми суд ба ҳар ду ҷинояткор- Ғаниев Дарёдил Имомҷонович ва Галуев Зайниддин Ҷумахонович ҷазо дар намуди маҳрум сохтан аз озодӣ ба муҳлати 9 сол бо адо намудани ҷазо дар муассисаи ислоҳии дорои низоми пурзӯр таъйин гардид.