Ҷавонони Тоҷикистон неруи созанда ва ободгари кишвар мебошанд

ДУШАНБЕ, 07.02.2017. /АМИТ «Ховар»/. Дар мақомоти иҷроияи маҳаллии ҳокимияти давлатии шаҳри Ваҳдат ҷаласаи ғайринавбатии Кумитаи иҷроияи Ҳизби Халқии Демократии Тоҷикистон дар шаҳри Ваҳдат баргузор гардид.
Тавре ки аз Кумитаи кор бо занон ва оилаи назди Ҳукумати Ҷумҳурии Тоҷикистон ба АМИТ «Ховар» хабар доданд, дар ҷаласа Соли ҷавонон эълон гардидани соли 2017 баррасӣ гардид.
Иштирокчиён зикр намуданд, ки ҷавонон дар ин сол имконияти боз ҳам бештари ба ҷомеа хубтар муаррифӣ кардани худро пайдо намуда, метавонанд ҳамқадами замона мебошанд. Ҷавонони Тоҷикистон неруи созанда ва ободгари кишвар мебошанд ва ҳар яки онҳо масъуланд, ки ба манфиати ҷомеа кори некеро ба анҷом расонанд.
Зикр гардид, ки ҷавонони кишвар бояд бо эҳсоси амиқи ватандӯстӣ ва масъулиятшиносӣ ба давлату Ватани хеш содиқ бошанд, зарари бегонапарастӣ ва фиребу найранги созмонҳои ифротгаро, бахусус амалҳои фоҷиабори онҳоро хуб дарк кунанд, дар ғафлат намонанд, зиракии сиёсиро аз даст надода, ҳимояи Ватанро аз таҳдиди хатарҳои муосир вазифаи ҷонии худ қарор диҳанд. Шиори ҷавонони шаҳри Ваҳдат «Мо — ҷавонони шаҳри Ваҳдат бо Пешвои миллат будем, ҳастем ва мемонем!» мебошад.