Ба донишҷӯён оид ба истифодаи самараноки маводи доруворӣ маълумоти исботшудаи илмӣ пешниҳод шуд

ДУШАНБЕ, 17.02.2017 /АМИТ «Ховар»/. Дар Маркази таълимӣ, илмӣ ва истеҳсолии «Фарматсия» барои донишҷӯёни курси 4-уми факултаи фармасевтии Донишгоҳи давлатии тиббии Тоҷикистон ба номи Абӯалӣ ибни Сино семинар-тренинг дар мавзӯи «Истифодаи самараноки маводи доруворӣ ва рӯйхати маводи дорувории асосии Ҷумҳурии Тоҷикистон» баргузор шуд. Дар ин бора ба мухбири АМИТ «Ховар» аз донишгоҳи мазкур иттилоъ доданд.
Бино ба иттилои манбаъ, дар семинар-тренинг ба донишҷӯён оид ба истифодаи самараноки маводи доруворӣ маълумоти эътимоднок ва илман исботшуда дода шуд. Зикр шуд, ки як роҳи асосии ҳалли масъалаи истифодаи ғайрисамараноки маводи доруворӣ- ин ҷорӣ намудани рӯйхати маводи дорувории асосӣ ба шумор меравад. Он таъминкунандаи истифодаи самаранок, бехатар ва аз ҷиҳати иқтисодӣ дастрас ба шумор меравад.
Дар охир барои паҳн намудани иттилооти саҳеҳ ва эътимодноки фармасевтӣ ба иштирокчиён маводи иттилоотӣ дода шуд.