«Бавария» ва «Реал» дар бозиҳои Лигаи чемпионҳои Аврупо қадаме ба пеш гузоштанд

ДУШАНБЕ, 16.02.2017/АМИТ «Ховар»/. «Бавария»-и Олмон ва «Реал»-и Испания баъди вохӯрии аввалашон дар рақобатҳои 1/8-ниҳоӣ дар бозиҳои Лигаи чемпионҳои Аврупо қадаме ба пеш гузоштанд.
«Бавария» дирӯз дар варзишгоҳи «Алянтс- Арена» дар ҳузури 70 000 тамошобин клуби футболи «Арсенал»-и Англияро бо натиҷаи 5:1 шикаст дод ва шармсор кард. То ҳол ягон маротиба «Арсенал» дар муқобили «Бавария» ба даври минбаъда роҳхат нагирифтааст. Дар ин вохӯрӣ Арйен Роббен (11), Роберт Левандовски (53) ва Томас Мюллер (88) муаллифи якголӣ ва Тяго Алкантара (56, 63) муаллифи ду гол шуданд. Аз дастаи «Арсенал» ягона голро Алексис Санчес (30) ба ҳадаф расонд.
«Реал» дар майдонаш «Наполӣ»-и Италияро бо ҳисоби 3:1 мағлуб кард, аммо натиҷаи бозии ҷавобӣ метавонад барои яке аз клубҳо тақдирсоз бошад.
Бозиҳои ҷавобӣ 7 март барпо мегарданд.