Дар минтақаи Кӯлоб тарзи туризми дохилӣ роҳандозӣ мешавад

ДУШАНБЕ, 02.02.2017. /АМИТ «Ховар»/. Гурӯҳи ҷавонони шаҳри Душанбе аз ҳисоби донишҷӯёни донишгоҳу донишкадаҳо ва дигар муассисаҳои таълимии шаҳри Душанбе тариқи қатора барои сайёҳат ба Кулоб сафар намуданд.
Тавре ки аз шуъбаи иттилоотию таҳлилии дастгоҳи Раиси вилояти Хатлон ба АМИТ «Ховар» хабар доданд, иқдом аз ҷониби Кумитаи ҷавонон, варзиш ва сайёҳии назди Ҳукумати кишвар роҳандозӣ гардид. Сайёҳони ҷавон аз маконҳои таърихию фарҳангии шаҳр дидан намуда, бо ин шаҳри бостонӣ аз наздик шинос гардиданд.
«Мо ин иқдомро ҷонибдорӣ мекунем, зеро баъди ташрифи сайёҳони ҷавони душанбегӣ бисёр нафарони синну соли гуногун ба мо муроҷиат карда, хоҳиш намуданд, ки ин тарзи туризми дохилиро дар минтақаи Кӯлоб низ ба роҳ монем. Муроҷиаткунандаҳо иброз намуданд, ки дар сурати ташкили ин усули сайёҳӣ онҳо метавонанд ҳуҷраеро оилавӣ киро намуда, дастҷамъона ба тамошои шаҳр бароянд. Ин беҳтарин усули сайёҳист, зеро мардум ҳам аз таърихи шаҳр огоҳ мегарданду ҳам он хеле камхарҷ аст. Ба сайёҳ дигар зарурати вақт сарф кардану дарёфт намудани меҳмонхонаи мувофиқ намемонад»,- гуфт сардори Бахши ҷавонон, варзиш ва сайёҳии минтақаи Кӯлоб Зайниддин Давлатов.