Хатлон: Таъмини тартиботи ҷамъиятӣ ва амнияти шаҳрвандон

ДУШАНБЕ, 16.02.2017. /АМИТ «Ховар»/. Бо мақсади таъмини тартиботи ҷамъиятӣ ва амнияти шаҳрвандон аз ҷониби Раёсати Вазорати корҳои дохилии Ҷумҳурии Тоҷикистон дар вилояти Хатлон дар ҳудуди шаҳри Қурғонтеппа чорабинии муштараки кормандони милитсия ва мутахассисони соҳаҳои гуногун ҷараён дорад.
Тавре аз Раёсати Вазорати корҳои дохилӣ дар вилояти Хатлон хабар доданд, дар чорабинии мазкур кормандони ҷузъу томҳои Раёсати Вазорати корҳои дохилӣ дар вилояти Хатлон, шуъбаи Вазорати корҳои дохилӣ дар шаҳри Қурғонтеппа, кормандони Кумитаи замин, шуъбаи меъморӣ ва шаҳрсозӣ, шабакаҳои барқӣ ва дигар сохторҳо иштирок доранд.
Ҳадафи ин тадбири муштарак пешгирии қонуншиканиҳо вобаста ба истифодаи ғайриқонунии неруи барқ, зӯран ишғол намудани қитъаи замин, ҳолати тозагию беҳдоштӣ, риояи қоидаҳои бехатарӣ аз сӯхтор, ҳаракат дар роҳ ва дигар ҳуқуқвайронкуниҳо мебошад.