Хуршед Икромӣ: ММТ аз воситаҳои замонавии технологияҳои иттилоотию коммуникатсионӣ истифода менамояд

ДУШАНБЕ, 06.02.2017. /АМИТ Ховар/. «Марказ барои эълон ва нашри натиҷаи имтиҳонҳо ҳамасола аз воситаҳои замонавии технологияҳои иттилоотию коммуникатсионӣ истифода менамояд. Соли 2016 натиҷаҳои имтиҳонҳо тибқи нақша 25 июл эълон гардида, оид ба иштироки ҳар довталаб дар ИМД (Имтиҳонҳои марказонидашудаи дохилшавӣ), аз ҷумла шумораи хол ва баллҳои бадастоварда ва ба озмуни тақсимот роҳ ёфтан ё наёфтан, дар кабинети инфиродии ӯ маълумоти муфассал ҷой дода шуд», — зикр кард Хуршед Икромӣ, директори Маркази миллии тестии назди Президенти Ҷумҳурии Тоҷикистон имрӯз зимни нишасти матбуотӣ.
Хуршед Икромӣ ҳамчунин таъкид намуд, ки Марказ барои дастрас кардани маълумот оид ба натиҷаи имтиҳонҳо хизматрасониро тавассути SMS-паёмаки телефонӣ низ ба роҳ монда, дар бораи натиҷаи имтиҳонҳо ба рақами телефони мобилии ҳар довталаб, ки онро дар вақти бақайдгирӣ нишон медиҳад, SMS-паёмаки ройгон фиристод. Дар баробари ин, барои фаҳмидани натиҷаи имтиҳонҳои худ ҳар як довталаб имкон дошт, ки аз хизматрасонӣ тавассути SMS-паёмаки пулакӣ истифода намояд.
«Инчунин дар бинои Марказ бахши минтақавии он дар шаҳри Хоруғ, дар шаҳру ноҳияҳои Қӯрғонтеппа, Кӯлоб, Хуҷанд, Истаравшан, Данғара ва Рашт нуқтаҳои иттилоърасонӣ ташкил гардида буд, ки довталабон имкон доштанд вобаста ба макони зисташон ба нуқтаҳои мазкур муроҷиат намуда, дар бораи натиҷаҳои имтиҳонсупории худ маълумот гиранд», — изҳор дошт Хуршед Икромӣ.