Кормандони маорифи ноҳияи Деваштич масъалаҳои пешбурди сатҳу сифати таълимро мавриди баррасӣ қарор доданд

ДЕВАШТИЧ, 11.02.2017. /АМИТ «Ховар»/. Паёми навбатии Асосгузори сулҳу ваҳдати миллӣ, Пешвои миллат, Президенти кишвар, муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ба омӯзгорони кишвар рӯҳу илҳоми тоза бахшида, бо ташаббускориву иқдомҳои неки бунёдкорию ободонӣ ба сӯйи ояндаи дурахшон раҳсипор гардида истодаанд. Тавре ба АМИТ «Ховар» мутахассиси шуъбаи таблиғоту иттилооти Кумитаи иҷроияи Ҳизби халқӣ- демократии Тоҷикистон дар ноҳияи Деваштич Лоиқ Тӯйчиев хабар дод, бо ҳамин мақсад, дар шуъбаи маорифи ноҳияи Деваштич семинари дастурдиҳии сарварони муассисаҳои таълимии ноҳия баргузор гардид. Дар семинар масъалаҳои Низомномаи шӯроҳои педагогӣ, таҳсилоти иловагии хонандагон, масъалаи муҳими пешбурди сатҳу сифати таълим ва ба нақша гирифтани чорабиниҳо дар муассисаҳои таълимӣ бахшида ба «Соли ҷавонон» мавриди баррасӣ қарор гирифтанд.
Мудири шуъбаи маориф Зикрулло Иброҳимов таъкид намуд, ки дар амалишавии нуқтаҳои Паёми Пешвои миллат, муҳтарам Эмомалӣ Раҳмон ва эълон гаштани соли 2017 «Соли ҷавонон» аз кормандони соҳаи маориф, падару модарон ва тамоми аҳли ҷомеа тақозо мегардад, ки дар баланд бардоштани сатҳу сифати таълиму тарбия ва омода намудани мутахассисони ҷавобгӯ ба талаботи замон саҳмгузор бошанд ва ба ин масъалаи ниҳоят муҳим бо камоли масъулият муносибат намоянд. Пешрафт ва рушди ҷомеа маҳз аз мақому манзалати омӯзгор ва сифати дониши хонандагон вобастагӣ дорад.
Робита ба ин Зикрулло Иброҳимов изҳори умед намуд, ки устодон ва толибилмон ҷиҳати баланд бардоштани мақоми мактабу маориф қувваю неруи маънавии худро ҳарчӣ бештар роҳандозӣ менамоянд.