«Манчестер Сити» ва «Атлетико»- ғолибони бозии аввали плей-оффи Лигаи чемпионҳои Аврупо

ДУШАНБЕ, 22.02.2017/АМИТ «Ховар»/.«Манчестер Сити»-и Англия ва «Атлетико»-и Испания дирӯз дар бозиҳои рафти плей-оффи Лигаи чемпионҳои Аврупо ба ғалаба комёб шуданд. Дар ин бора сайти УЭФА хабар медиҳад.
«Манчестер Сити» дар варзишгоҳи «Иттиҳод» дар баробари «Манако»-и Франсия бозиеро нишон дод, ки то ин дам дар рақобатҳои 1/8-ниҳоии Лигаи чемпионҳои Аврупо рух надода буд. Соҳибони майдон тавассути голи задаи Раҳим Стерлинг (20-ум дақиқа) ба сафи пеш баромаданд, аммо «Монако» ба ин гол бо ду голи Радамел Фалкао (32) ва Клиан Мбаппе (40) ҷавоб гардонд.
Дар оғози нимаи дуюм «Манчестер Ситӣ» ҳисобро баробар кард. Серхио Агуэро (58) голро ба номи худ сабт кард. Баъди ду дақиқа Фалкао боз ду тӯбро ба дарвозаи Вилли Кабалеро равон намуда, меҳмононро шод гардонд. Ин голи охирини дастаи муҳмонон буд. Баъдан Агуэро (71,3:3) Ҷон Стоунс (77, 4:3) ва Лерой Зане (83, 5:3) ба дарвозаи «Монако» тӯбҳоро равон карда, натиҷаи 5:3-ро бар ҷой гузоштанд. Дар ин бозӣ Фалкао (50) зарбаи пеналтиро ба ҳадаф нарасонд.
Дар бозии дуюми рӯз «Атлетико» дар сафар «Байер»-и Олмонро шикаст дод. Натиҷаи 4:2 «Атлетико» -ро бе дудилагӣ ба бозиҳои минбаъда роҳбалад хоҳад сохт. Голҳоро аз «Атлетико» Саул (17), Антуан Гризманн (25), Кевин Гамейро (58) ва Фернандо Торрес (86) ва аз «Байер» Карим Беларабӣ (48) ва Стефан Савич (86) ба нишон расонидаанд.

Бозиҳои ҷавобӣ 15 март барпо мегарданд.