«Мегафон» шарики расмии Лигаи футболи Тоҷикистон гардид

ДУШАНБЕ, 13.02.2017/АМИТ «Ховар»/. Ширкати «Мегафон» шарики расмии Лигаи футболи Тоҷикистон гардид. Дар ин бора ФФТ шартномаи худро то охири мавсими соли 2017 ба имзо расонд.
Тавре сомонаи ФФТ хабар медиҳад, дар ҳузури ноиби президенти ФФТ Хуршед Мирзо ба ин санади ҳамкорӣ директори Лигаи футболи Тоҷикистон Алишер Урунов ва директори иҷроияи ширкати «Мегафон» дар Тоҷикистон Денис Никитин имзо гузоштанд.
«Футболи касбиро дар Тоҷикистон дастгирӣ кардан ҷанбаи иҷтимоии сиёсати ширкати мо мебошад. Тибқи ин шартномае, ки имрӯз ба имзо расид, мо ният дорем кумаки назарраси худро ба ФФТ расонем»,-гуфт директори иҷроияи ширкати «Мегафон» дар Тоҷикистон Денис Никитин.
Барои ин ҳамкорӣ аз ҷониби ФФТ директори Лигаи футболи Тоҷикистон Алишер Урунов изҳорӣ минатдорӣ карда, гуфт: «Хеле шодем, ки чунин шарики боэътимоде дар симои ширкати «Мегафон» пайдо кардем ва ҳамкории мо тӯлонӣ хоҳад буд».
Мавсими соли 2017 аз нигоҳи сарпарастӣ барои ФФТ нисбат ба солҳои пешин фарқкунанда аст. Ченде пештар ширкати «Лото Спорт» ҳам шартномаашро бо Лигаи футболи Тоҷикистон ба имзо расонид.