Н. Ҳикматуллозода бо А. Гасанов баргузории ҷаласаи Комиссияи байниҳукуматии Тоҷикистону Озарбойҷонро баррасӣ карданд

ДУШАНБЕ, 08.02.2017 /АМИТ «Ховар»/. Дирӯз Неъматулло Ҳикматуллозода, Вазири рушди иқтисод ва савдои Ҷумҳурии Тоҷикистон бо Аббосалӣ Гасанов, Сафири Фавқулода ва Мухтори Ҷумҳурии Озарбойҷон дар Ҷумҳурии Тоҷикистон мулоқот кард.
Тавре аз Хадамоти матбуоти Вазорати рушди иқтисод ва савдо хабар доданд, зимни мулоқот ҷонибҳо атрофи баргузории ҷаласаи навбатии Комиссияи байниҳукуматии Тоҷикистону Озарбойҷон, инчунин масъалаҳои вобаста ба тавсеаи муносибатҳои иқтисодию тиҷоратӣ, рушди бахши хусусӣ, афзоиши гардиши молу маҳсулот, барқарор намудани алоқаи ҳавоӣ ва таъсиси корхонаҳои муштарак мубодилаи афкори судманд намуданд.
«Дар интиҳои вохӯрӣ тарафҳо азми қавии худро ҷиҳати густариши минбаъдаи ҳамкорӣ байни Тоҷикистону Озарбойҷон баён доштанд»,- хабар дод манбаъ.