Намоишгоҳи байналмилалии «Осиё-2017» дар Қарочии Покистон

ДУШАНБЕ,27.02.2017 /АМИТ «Ховар»/. Дар арафаи ҷашни Наврӯз рӯзҳои 20-22 март дар шаҳри Қарочии Покистон «11-умин намоишгоҳи байналмилалии «Осиё- 2017» оид ба пластик, банду баст ва чоп (PLASTIC, PACKAGING & PRINT ASIA INTERNATIONAL EXHIBITION & CONFERENCE) баргузор мегардад. Дар ин хусус ба АМИТ «Ховар» аз Палатаи савдо ва саноати Ҷумҳурии Тоҷикистон иттилоъ доданд.
Интизор меравад, ки дар 11-умин намоишгоҳи байналмилалии «Осиё- 2017» бархе аз ширкату корхонаҳои кишварамон, ки ба банду баст ва чоп сару кор доранд, иштирок намоянд.
Ҳадаф аз баргузории намоишгоҳ муаррифии дастовардҳои молистеҳсолкунандагон ва ширкату корхонаҳои наздик ба 50 кишвари ҷаҳон дар бахши пластик, бастабандии таҷҳизот, технология ва чоп арзёбӣ мегардад. Намоишгоҳ дар масоҳати 8 ҳазор метри мураббаъ доман густурда, интизор аст беш аз 60 ҳазор нафар аз намоишгоҳ боздид намоянд.