Пагоҳ дар Тоҷикистон бориши барф шиддат мегирад

ДУШАНБЕ, 03.02.2017 /АМИТ «Ховар»/. Имшаб дар Тоҷикистон бориши барф пуршиддат шуда, пагоҳ низ идома меёбад.
Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон ба иттилои аҳолии ҷумҳурӣ мерасонад, ки 4 феврал дар тамоми ноҳияҳои ҷумҳурӣ боридани барфи зиёд ва паст фаромадани ҳарорати ҳаво то 10 12 дар назар дошта шудааст. Дар ағбаҳои кўҳӣ туману яхбандӣ пешбинӣ гардида, дар ноҳияҳои кўҳӣ фаромадани тарма аз эҳтимол дур нест.
Бар асоси пешгӯии обуҳавошиносон, ҳарорати ҳаво дар вилояти Суғд шабона то -3-8 дараҷа, рӯзона 0-5 дараҷа хунук, дар Хатлон шабона 2-7 дараҷа,рӯзона 0-5 дараҷа хунук, навоҳии тобеи марказ — шабона 2 -7 дараҷа ва рӯзона 1-6 дараҷа хунук, дар ғарби ВМКБ шабона -9-14 дараҷа, рӯзона 5-10 дараҷа хунук, дар шарқ ҳарорати ҳаво шабона 22-27 дараҷа, дар баъзе ҷойҳо то 33 дараҷа, рӯзона то 25 дараҷа хунук хоҳад шуд.
Дар Душанбе ҳарорати ҳаво шабона 2-7 дараҷа, рӯзона 1-6 дараҷа хунук мешавад.
Тавре ба АМИТ «Ховар» аз Агентии обуҳавошиносии кишвар хабар доданд, дар моҳи феврал дар ҷумҳурӣ боридани барфу борони аз меъёр зиёд аз эҳтимол дур нест.
Бинобар ин Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон аз шаҳрвандони ҷумҳурӣ ва меҳмонон хоҳиш менамояд, ки дар ин рӯз аз сафар кардан тавассути минтақаҳои кӯҳию осебпазир худдорӣ намоянд.
Эҳтимолияти фаромадани тарма дар навоҳии ВМКБ, роҳҳои мошингарди Душанбе-Хоруғ, Душанбе-Хуҷанд, Душанбе-Ҷиргатол, Хоруғ-Мурғоб, Хоруғ-Ишкошим вуҷуд дорад.