Паёми Пешвои миллат-роҳнамо ба сӯи бунёдкориву созандагӣ!

ДУШАНБЕ, 08.02.2017 /АМИТ «Ховар»/. Дар Муассисаи давлатии Иттиҳодияи давлатии гурӯҳҳои эҷодию консертӣ дар мавзӯи «Паёми Пешвои миллат-роҳнамо ба сӯи бунёдкориву созандагӣ!» ҷаласа баргузор гардид.
Абдурасул Ҳалимов, директори муассиса зикр намуд, ки Паёми навбатии Президенти мамлакат муҳтарам Эмомалӣ Раҳмон ҷиҳати баррасии паҳлӯҳои ҳаёти иҷтимоиву иқтисодӣ, бурдбориву дастовардҳои ҷомеаи имрӯза ҳамаҷониба бо рақамҳои оморӣ амиқ таҳлил ёфта, самтҳои муайяни фаъолияти ҷомеаро нишон додааст.
«Барномаи дурнамои зиддибуҳронии иқтисодиву молиявии ҷаҳон, ки аз тарафи ҳукумат тарҳрезӣ шудааст, гувоҳи он аст, ки Тоҷикистони азизи мо дар ояндаи наздик ба тараққиёту пешравиҳои зиёд ноил мегардад», — иброз дошт Абдурасул Ҳалимов ва илова намуд, ки кормандони муассиса дастуру ҳидоятҳои Пешвои миллатро, ки дар Паёми навбатӣ зикр гардидаанд, сармашқи кори худ қарор дода, барои ободии Тоҷикистон софдилона меҳнат намоянд.