Сарбанд: Рӯзи дарҳои кушода ба хотири баланд бардоштани маърифати тиббии ҷавонон

ДУШАНБЕ, 08.02.2017. /АМИТ «Ховар»/. Маркази ташаккули тарзи ҳаёти солими шаҳри Сарбанд дар бунгоҳи тиббии деҳаи Боҳтурободи ҷамоати деҳоти «Гулистон» бо иштироки кормандони маркази репродуктивии шаҳр Рӯзи дарҳои кушода доир намуд.
Бино ба иттилои шуъбаи иттилоотию таҳлилии дастгоҳи раиси вилояти Хатлон, дар чорабинӣ духтурони Маркази солимии репродуктивии вилояти Хатлон бо занони деҳоти атроф суҳбат карда, доир ба пешгирии ҳамли номатлуб, бемориҳои сироятшавандаи ҷинсӣ, баланд бардоштани маърифати тиббии ҷавонон ва ба ҳаёти оиладорӣ тайёр намудани ҷавонон маълумот пешниҳод намуданд.
«Соли гузашта бо мақсади пешгирӣ аз бемориҳои хавфноки ба таври алоқаи ҷинсӣ гузаранда дар марказ беш аз 1000 нафар ҷавонон ва онҳое, ки аз муҳоҷирати меҳнатӣ баргаштаанд, аз ташхиси тиббӣ гузаронида шуданд»,-иброз дошт З. Алимова, Директори Маркази солимии репродуктивии шаҳри Сарбанд.
Дар ин рӯз 53 нафар занон аз хизмати ройгони тиббӣ бархӯрдор гаштанд.