«Шоҳмот барои таҳкими неруи зеҳнии ҷавонон ва пешгирии ифротгароӣ»-мусобиқаи шоҳмотбозон дар Ёвон

Ёвон, 17.02.2017. /АМИТ «Ховар»/. Ба ифтихори Соли ҷавонон, бо мақсади дастгирии  ҷавонону  наврасони лаёқатманд Бахши ҷавонон, варзиш ва сайёҳии ноҳияи Ёвон дар якҷоягӣ бо Шӯрои собиқадорони ҷангу меҳнати ноҳия мусобиқаи шоҳмотбозонро таҳти унвони «Шоҳмот барои таҳкими неруи зеҳнии ҷавонон  ва пешгирии ифротгароӣ» доир намуд. Дар ин бора  мудири Бахши ҷавонон, варзиш ва сайёҳии ноҳияи Ёвон  Эраҷ Раҷабов ба хабарнигори  АМИТ «Ховар» иттилоъ дод.
Дар мусобиқа зиёда аз 80 нафар қувваозмоӣ намуданд ва натиҷаи ниҳоӣ чунин шуд: ҷойи аввал насиби сокини ноҳияи Файзобод Оймаҳмад Сулаймонов, ҷойи дуюм насиби сокини ноҳияи Ёвон  Файзалӣ Сафархолов  ва ҷойи сеюм насиби сокини ноҳияи Ёвон Ҳамза Раҷабов гардид.

Ғолибон бо ифтихорнома ва туҳфаҳои хотиравӣ сарфароз гардонида шуданд.