У. Ғуломҳайдарова: «Ягона дархости Ватан аз шумо ин аст, ки бо навбат марзу бумро ҳимоя намоед, то қадами номубораки душман ба он наздик нашавад»

ХОРУҒ, 21.02.2017 /АМИТ «Ховар»/. Бо ибтикори шуъбаи кор бо занон ва оилаи назди мақомоти иҷроияи маҳаллии ҳокимияти давлатии ВМКБ дар муассисаи Мактаби президентии шаҳри Хоруғ мулоқоти волидони сарбозоне, ки дар қисмҳои низомии ҷумҳурӣ адои хизмат мекунанд, баргузор гардид. Дар вохӯрӣ хонандагони синфҳои болоӣ ширкат намуданд. Улфатхоним Ғуломҳайдарова, ки писараш Фаридун дар қӯшунҳои ҳавоии яке аз қисмҳои низомии мустақар дар ноҳияи Ҳисор хизмати Ватан-Модарро ба ҷо меорад, изҳор намуд, ки фарзандаш довталабона ба хизмати аскарӣ рафт. «Ҳангоме писарам ин тасмимро гирифт, мо ӯро дастгирӣ кардем. Ҳар як падар ё модар фарзандашро ба он умед калон мекунад, ки барои Ватан хизмат кунад, дасти як нотавонро бигирад ва ё ба касе некӣ кунад. Чунин фарзанд ҳам барои Ватан ва ҳам миллату волидайн фақат шарафу ифтихор меорад».
Улфатхоним Ғуломҳайдарова бо муроҷиат ба хонандагон таъкид намуд, ки Ватан барои таҳсилу кори шумо шароит муҳайё намудааст, то зиндагӣ ва рӯзгори худро пеш баред. Ягона дархости Ватан аз шумо ин аст, ки бо навбат марзу бумро ҳимоя намоед, то қадами номубораки душман ба марзаш наздик нашавад.
Сардори шуъбаи кор бо занон ва оилаи мақомоти иҷроияи маҳаллии ҳокимияти давлатии ВМКБ Сайёра Замирова аз иҷрои барвақти нақшаи маъракаи баҳорӣ ва тирамоҳии соли гузашта изҳори қаноатмандӣ намуда, баён дошт, ки маҳз таълиму тарбияи чунин модарон моро ба ҳадафҳои аслӣ- таъмини амнияти фазои дохилӣ ва хориҷиамон мерасонад.