Ҳунарнамоии «Шоҳзодаи араб — Хамакута» дар Сирки давлатии Тоҷикистон

ДУШАНБЕ, 08.02.2017 /АМИТ «Ховар»/. 11 феврали соли равон дар Сирки давлатии Тоҷикистон аввалин намоиши сиркии ҳунармандони Федератсияи Россия, Ӯзбекистон ва Миср баргузор мегардад. Дар ин бора аз Вазорати фарҳанги Ҷумҳурии Тоҷикистон хабар доданд.

Ба иттилои манбаъ, 12 нафар бандбозон (акробатҳо) ва ширинкорон (каскадёрҳо) аз Москва, ду нафар дорбозон аз Ӯзбекистон ва ду нафар ромкунандаи ҳайвонот аз Миср барои ҳаводорони сирк барномаи шавқовару навро пешниҳод хоҳанд кард.

Дар қисми аввали барнома «Чархи марг» ва «Мото-курра», дар қисми дуюм ҳунарнамоии шербоз бо тахаллуси «Шоҳзодаи араб — Хамакута» аз ҷолибтарин ва диданитарин намоишҳо мебошанд.

Ташаббуси сафари ҳунарӣ ба Тоҷикистон аз ҷониби Сирки Москва роҳандозӣ шуда, барномаҳо то 12 март идома меёбанд.