Вазорати корҳои дохилӣ: шаҳрвандон уҳдадоранд, ки симкортҳои худро аз сари нав ба қайд гузоранд

ДУШАНБЕ, 17.02.2017. /АМИТ «Ховар»/. Вобаста ба иҷрои Қарори Ҳукумати Ҷумҳурии Тоҷикистон «Дар бораи тартиб ва талаботи пайвастшавӣ ба шабакаи алоқаи барқӣ ва хизматрасониҳои вобаста ба он», Вазорати корҳои дохилии Ҷумҳурии Тоҷикистон аз тамоми шаҳрвандон хоҳиш кардааст, то симкортҳои худро аз сари нав ба қайд гузоранд. Дар ин бора аз Вазорати корҳои дохилӣ хабар доданд.
Тавре дар сомонаи ин ниҳод омадааст: «Аз тамоми истифодабарандагони симкортҳо (муштариён) хоҳиш карда мешавад, ки дар муҳлати муқарраргардида шиносномаҳои худро бо нишон додани рақамҳои телефонҳои мобилӣ барои аз сари нав ба қайд гирифтани симкортҳо ба ширкатҳои марбута пешниҳод намоянд».
Бояд гуфт, ки Қарори Ҳукумати Ҷумҳурии Тоҷикистон «Дар бораи тартиб ва талаботи пайвастшавӣ ба шабакаи алоқаи барқӣ ва хизматрасониҳои вобаста ба он» мутобиқ ба талаботи замони муосир роҳандозӣ гардида, дар таъмини амният, ҳифзи ҳуқуқҳои шаҳрвандон ва ба танзим даровардани хизматрасониҳо мусоидат менамояд.