Баргузории намоиши китобҳои наврӯзӣ дар Донишгоҳи давлатии Хуҷанд

ХУҶАНД, 17.03.2017. /АМИТ «Ховар»/.  Дар арафаи таҷлили Наврӯзи байналмилалӣ дар Китобхонаи марказии Донишгоҳи давлатии Хуҷанд ба номи академик Б.Ғафуров намоиши китобҳои тозавуруди китобхонаи марказии донишгоҳ баргузор гардид.

Тавре хабарнигори минтақавии АМИТ «Ховар» хабар дод, дар намоиш зиёда аз 1000 адад китобҳои тозавуруд, китобҳои Пешвои миллат, китобҳои устодон ва аз рӯи ихтисосҳо китобҳо ба намоиш гузошта шуданд. Дар доираи баргузории намоиш иштирокдорони он, донишҷӯёну омӯзгорони донишгоҳ ширкати фаъолона варзида, аз намоиши китобҳои диққатҷалбкунанда баҳравар гардиданд.

Ба иттилои масъулини раёсати донишгоҳ, ҳадафи намоиши китобҳои тозавуруд ҷалби ҷавонон, хосатан донишҷӯён ба омӯзиши ҳарчӣ бештари илму дониш, шукргузорӣ аз ватани маҳбуб, расидан ба қадри олитарин арзиши башарият -ҳаёт ва озодии инсон, эҳтироми падару модар, баланд бардоштани сатҳи донишу маърифат ва фарҳанги насли ҷавон мебошад.