Хизматрасонии босифати тиббӣ ба модар ва кӯдак мавриди баррасӣ қарор гирифт

ДУШАНБЕ, 14.03.2017 /АМИТ «Ховар»/. Бо мақсади беҳтар намудани хизматрасонии босифати тиббӣ ва ғизои солим барои модарон, кӯдакон ва навзодон дар Маркази саломатии шаҳри Қӯрғонтеппа дар мавзӯи «Ташрифҳои сарпарастори дастгирикунанда ва мушкилот дар самти беҳтар намудани сифати хизматрасониҳои тиббӣ ба модару кӯдак» ҳамоиш баргузор гардид. Дар ин бора аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд.
Бино ба иттилои манбаъ, ҳамоиш дар ҳамкорӣ бо Шуъбаи ташкилоти «Интрахелс Интернейшнл» дар доираи Лоиҳа оид ба саломатӣ ва ғизо- «Озуқаворӣ ба хотири оянда» сурат гирифт.
Дар ҳамоиш намояндагони Раёсати тандурустии вилояти Хатлон, марказҳои солимии репродуктивӣ ва мудирони шуъбаҳои таваллуди шаҳру ноҳияҳои А.Ҷомӣ, Дӯстӣ, Ҷ.Балхӣ, Ҷайҳун ва шаҳри Сарбанд, инчунин менеҷерони сохтори госпиталӣ ва ҳамзамон дигар масъулону мутахассисони соҳа мушкилоти соҳаро баррасӣ карданд.
Иштирокчиён беҳтар намудани хизматрасонии босифати тиббӣ ва ғизои солим барои модарон, кӯдакон ва навзодонро масъалаи ҳалталаб ва баррасии онро саривақтӣ унвон намуданд.