Ғолибони пойгаи аспдавонӣ соҳиби мошин, шутур ва асп гардиданд

ДУШАНБЕ, 25.03.2017 /АМИТ «Ховар»/.  24 марти соли равон  дар Муассисаи давлатии «Наврӯзгоҳи пойтахт» мусобиқаи ҷумҳуриявӣ оид ба пойгаи аспдавонӣ барои дарёфти «Ҷоми пойтахт-2017» баргузор гардид.
Дар мусобиқаи мазкур варзишгарони аз 16- сола боло бо аспҳои 2, 3 ва 4- сола иштирок намуда,   дар даҳ марҳила байни ҳам рақобат карданд.
Баъд аз баргузории мусобиқа Шоҳҷоиза дар байни аспҳои зоти тоҷикии аз 4-сола боло насиби  аспи тоҷикӣ бо лақаби «Гандикап» аз хоҷагии деҳқонии «Мир»-и ноҳияи Ховалинг  ва  ҷои якум насиби Анушервони Рустам аз шаҳри Душанбе бо аспи саворӣ бо номи «Рахш» гардид.
Мусобиқаи пойгаи аспдавонӣ барои дарёфти «Ҷоми пойтахт-2017» аз ҷониби Мақомоти иҷроияи ҳокимияти давлатии шаҳри Душанбе дар якҷоягӣ бо Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон  бахшида ба ҷашни Наврӯзи байналмилллӣ ва Соли ҷавонон роҳандозӣ шуда, ғолибони он бо мошин, шутур ва асп қадрдонӣ шуданд.