Дар шаҳри Кӯлоб озмуни «Мо ва Шоҳнома» баргузор гардид

ДУШАНБЕ, 05.04.2017 /АМИТ «Ховар»/. Бо ташаббуси Китобхонаи вилоятии ба номи Садриддин Айнии шаҳри Кӯлоб ва Китобхонаи бачагонаи вилоятӣ дар доираи Фестивали ҷумҳуриявии «Ҳафтаи китоби кӯдакону наврасони Тоҷикистон» дар толори машваратии Китобхонаи вилоятӣ байни хонандагони муассисаҳои таълимии шаҳри Кӯлоб озмуни «Мо ва Шоҳнома» баргузор гардид. Дар ин бора аз Вазорати фарҳанги Ҷумҳурии Тоҷикистон иттилоъ доданд.
Зимни баргузории озмун ғояҳои муқаддас, ки дар китоби «Шоҳнома»-и Абулқосим Фирдавсӣ таҷассум ёфтаанд, аз ҷумла тарғиби арҷгузорӣ ва ифтихор аз фарҳангу таърихи пурғановати гузаштагон, муҳаббат ба Ватан, далерию мардонагӣ, Ваҳдати миллӣ ва дигар арзишҳо тарғиб гардиданд.
Дар анҷоми фестивал ғолибони озмун бо ифтихорнома ва туҳфаҳои хотиравии бахши раёсати фарҳанги минтақаи Кӯлоб ва Китобхонаи вилоятии ба номи С. Айнии шаҳри Кӯлоб сарфароз гардонида шуданд.