Дар шаҳри Ваҳдат корхонаи коркарди пӯст таъсис дода мешавад

ДУШАНБЕ, 11.04.2017 /АМИТ «Ховар»/. Дар шаҳри Ваҳдат корхонаи ҶДММ «Сомон Чарм» оид ба коркарди пӯсти чорвои шохдори калон ва хурд таъсис дода мешавад. Ба иттилои Вазорати саноат ва технологияҳои нави Ҷумҳурии Тоҷикистон, бо таъсиси ҶДММ «Сомон Чарм» 40 нафар шаҳрвандон бо ҷойи корӣ таъмин мешаванд.
Корхона бо мақсади коркарди пурраи ашёи хом, таъсиси ҷойҳои нави корӣ ва афзун намудани ҳаҷми истеҳсоли маҳсулот таъсис меёбад.
Ҳоло корҳои сохтмонии корхонаи мазкур идома дошта, бунёди 4 адад ҳавзчаҳо бо ғунҷоиши 700 адад пӯст барои тар кардан бо маводи зарурӣ ба анҷом расонида шудааст.
Дар назар аст, ки корхона рӯзҳои наздик ба фаъолият оғоз намояд.