Искандар Солеҳзода: «Ҳар як амалу кирдоре, ки аз ҷониби ҷавонон содир мегардад, ҷавобгарӣ дорад»
![](https://khovar.tj/wp-content/uploads/2017/04/Vohuri-DD-Kulob-3_1.jpg)
ДУШАНБЕ, 12.04.2017 /АМИТ «Ховар»/. Дар толори Донишгоҳи давлатии Кӯлоб ба номи Абуабдуллоҳи Рӯдакӣ вохӯрии сардори Раёсати ВКД дар вилояти Хатлон, генерал-майори милитсия Искандар Солеҳзода бо устодону донишҷӯён баргузор гардид.
Искандар Солеҳзода дар суханронии худ зикр кард, ки таъмини тартиботи ҷамъиятӣ, пешгирии ҷинояткорӣ ва ҳуқуқвайронкуниҳо кафолати амнияти дохилӣ дар кишвар буда, иҷрои ин вазифаи муқаддас ба зиммаи кормандони мақомоти корҳои дохилӣ вогузор гардидааст.
«Набояд фаромӯш кард, ки ҳар як амалу кирдори ношояме, ки аз ҷониби наврасону ҷавонон содир мегардад, ҷавобгарӣ дошта, таъсири манфии худро дар ҳаёти ояндаи онҳо мегузорад. Бо ташаббуси Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2017 Соли ҷавонон эълон гардид, ки ин иқдом мақому мартабаи ҷавононро дар ҷомеа боз ҳам боло мебардорад»,- гуфт Искандар Солеҳзода.
Ба андешаи номбурда, сабаби даст ба ҷиноят задани бархе аз ҷавонон сатҳи пасти савияи дониши ҳуқуқӣ ва маърифатнокии онҳо мебошад. Ҷавонон бояд пайваста ба омӯхтани илму дониш, мусобиқаҳои варзишӣ, баргузории ҳар гуна маҳфилҳо, дӯст доштани Ватани худ ва арҷгузорӣ ба арзишҳои миллӣ бештар таваҷҷуҳ зоҳир намуда, ба амалу кирдорҳои номатлуб даст назананд.