Кумитаи Иҷроияи ҲХДТ дар шаҳри Исфара барои таҳсил дар мактабҳои олии омӯзгорӣ грант таъсис дод

ДУШАНБЕ, 12.04.2017 /АМИТ «Ховар»/. Кумитаи иҷроияи Ҳизби Халқии Демократии Тоҷикистон дар шаҳри Исфара барои таҳсил дар мактабҳои олии Тоҷикистон барои соли 2017 се грант таъсис дод.
Тавре аз Маркази таҳлилию иттилоотӣ ва зеҳнии Кумита хабар доданд, иқдоми мазкур бо мақсади амалишавии Паёми Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ҷиҳати таъмини муассисаҳои таълимӣ бо омӯзгорони баландихтисос, ҳалли масъалаи норасоии омӯзгорон ва бо кадрҳои дорои таҳсилоти олии касбӣ таъмин намудани мактабҳои деҳот роҳандозӣ карда шудааст.
Дар айни замон аз ҷониби як гурӯҳи корӣ дар мактабҳои таҳсилоти умумии шаҳр барои гузаронидани озмуни довталабони гирандаи гранти Кумитаи Иҷроияи ҲХДТ дар шаҳри Исфара корҳои фаҳмондадиҳӣ ба роҳ монда шудааст.
Маблағгузории грант аз ҳисоби маблағҳои пешбинишудаи хароҷоти намояндагии тарҳи ягонаи даромад ва хароҷоти Кумитаи Иҷроияи ҲХДТ дар шаҳри Исфара барои соли 2017 ба роҳ монда мешавад.