«Соддагардонӣ ва ҳамоҳангсозии расмиёти гумрукӣ дар таҳрири нав»-семинари омӯзишӣ барои кормандони гумрук

ДУШАНБЕ, 11.04.2017 /АМИТ «Ховар»/. Ҷумҳурии Тоҷикистон барои муҳайё намудани шароити боз ҳам мусоид барои рушди савдои хориҷӣ ва додани имтиёзҳо ба соҳибкорон, ки ба воридоти молу маҳсулот машғул мебошанд, бо қарори Маҷлиси намояндагони Маҷлиси Олии Ҷумҳурии Тоҷикистон «Дар бораи ҳамроҳшавии Ҷумҳурии Тоҷикистон ба Конвенсияи байналмилалӣ оид ба соддагардонӣ ва ҳамоҳангсозии расмиёти гумрукӣ» аз 1 октябри соли 2015 ба Конвенсияи мазкур ҳамроҳ гардидааст.
Тавре аз Маркази матбуоти Хадамоти гумруки назди Ҳукумати Ҷумҳурии Тоҷикистон хабар доданд, бо мақсади дар амал татбиқ намудани муқаррароти Конвенсияи мазкур, бо дастгирӣ ва ҳамоҳангии Созмони умумиҷаҳонии гумрук дар Донишкадаи такмили ихтисоси Хадамоти гумруки назди Ҳукумати Ҷумҳурии Тоҷикистон бо иштироки кормандони мақомоти гумрук ва мутахассиси Созмони умумиҷаҳонии гумрук семинари омӯзишӣ баргузор гардид.
Мақсади семинар баланд бардоштани сатҳи дониш ва малакаи хизматрасонии кормандони соҳаи гумрук арзёбӣ гардида, дар интиҳо ба иштирокчиён дар бораи хатми бомуваффақияти омӯзиши Конвенсияи байналмилалӣ «Оид ба соддагардонӣ ва ҳамоҳангсозии расмиёти гумрукӣ дар таҳрири нав» сертификат супорида шуд.