Алимурод Исломзода: «Оби нӯшокие, ки ба аҳолии Тоҷикистон расонида мешавад, арзонтарин об дар ҷаҳон мебошад»

ДУШАНБЕ, 23.05.2017. /АМИТ «Ховар»/.  Дирӯз дар Душанбе роҷеъ ба масъалаи таъмини аҳолӣ бо оби нӯшокӣ бо ширкати намояндагии мақомоти тоҷик ва намояндагони созмонҳои байналмилалӣ Форуми минтақавии Аврупоӣ ва Осиёи Миёнагӣ оид ба ҳисоботдиҳанда будан ба ҷамъият дар бахши об аз ҷониби созмони бритониёии «Оксфам» ва Барномаи ҳамкорӣ баргузор гардид.

Дар ҳамоиш роҳбари Корхонаи воҳиди давлатии «Хоҷагии манзилию коммуналӣ»-и Ҷумҳурии Тоҷикистон Алимурод Исломзода аз беҳтар гаштани сатҳу сифати  таъмини аҳолии кишвар бо оби тозаи нӯшокӣ ҳарф зада, зикр кард, ки «агар ба омори таъмини аҳолӣ бо оби ошомиданӣ назар намоем, хушбахтона, сол то сол сифати таъмини аҳолӣ бо оби нӯшокӣ боло меравад. Дар соли 2012 агар 42,6 фоизи аҳолӣ ба оби тозаи ошомиданӣ дастрасӣ доштанд, ин миқдор дар соли 2013 ба 48,6% ва дар соли 2016   ба 57,6 фоиз расонида шуд».

Ба гуфтаи Алимурод Исломзода, Ҷумҳурии Тоҷикистон дар ҷаҳон аз ҷиҳати оби арзонтарин мавқеи аввалро ишғол мекунад. «Нархи арзиши як мукаабметр оби ошомидание, ки ба аҳолӣ расонида мешавад, ҳамагӣ 88 дирам аст, ки ин арзонтарин об дар ҷаҳон мебошад. Мо кӯшиш мекунем,  ки мардуми Тоҷикистонро боз ҳам беҳтар бо оби ошомиданӣ таъмин кунем»,- афзуд Тағоймурод Исломзода.

Бояд гуфт, ки форуми мазкур бо ширкати намояндагони даҳ кишвари дунё ду рӯзи дигар идома меёбад.