Ҷавонони тоҷик дар Пекин ба ифтихори Соли ҷавонон ва Рӯзи Ваҳдати миллӣ ҷамъ омаданд

ДУШАНБЕ, 22.05.2017 /АМИТ «Ховар»/. Сафорати Ҷумҳурии Тоҷикистон дар Ҷумҳурии Мардумии Чин 21 май ба муносибати Соли ҷавонон эълон гардидани соли 2017 ва бахшида ба 20-умин солгарди имзои Созишномаи умумии истиқрори сулҳ ва ризоияти миллӣ миёни тоҷикон бо донишҷӯён аз Ҷумҳурии Тоҷикистон, ки дар шаҳри Пекин таҳсил мекунанд, вохӯрӣ доир намуд.

Тавре аз Сафорати Тоҷикистон дар Чин ба АМИТ «Ховар» хабар доданд, зимни вохӯрӣ ҳам аз ҷониби роҳбарияту кормандони Сафорат ва ҳам аз ҷониби ҷавонон-донишҷӯёни тоҷик ифтихор доштан аз Ватан ва ҳимоя намудану содиқ будан ба он, расидан ба қадри таваҷҷуҳ ва ғамхории Ассосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати Тоҷикистон нисбат ба ҷавонон, гиромӣ ва пос доштани сулҳу ваҳдат ва дастовардҳои кишвар, илм омӯхтану касб гирифтан, саҳм гузоштан дар пешрафти давлат ва аз даст надодани ҳушёрию зиракӣ таъкид карда шуд.