Баррасии баъзе мушкилоти ҳаёти ҷавонон бо сокинони ноҳияи Бобоҷон Ғафуров
![](https://khovar.tj/wp-content/uploads/2017/05/Vohurii-raisi-Kumitai-chavonon-bo-sokinoni-n.-B.Gafurov-1.jpg)
ДУШАНБЕ, 11.05.2017 /АМИТ «Ховар»/. Бо мақсади иҷрои дастуру супоришҳои Пешвои миллат муҳтарам Эмомалӣ Раҳмон гурӯҳи корӣ аз ҳисоби масъулини вазорату идораҳо ба вилояти Суғд сафар кард.
Тавре мудири бахши таҳлилу иттилоотии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Зубайдулло Маҳмадуллоев хабар дод, 10 майи соли равон мулоқоти раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Аҳтам Абдуллозода дар ноҳияи Бобоҷон Ғафуров бо сокинони ҷамоатҳои деҳоти Ғафуров, Исфисор ва Зарзамин доир шуд.
Аҳтам Абдуллозода аз таҳсили ғайриқонунии динии баъзе ҷавонон изҳори нигаронӣ карда, иброз дошт, ки «ба таҳсили ғайриқонунии динӣ рӯй овардани ҷавонон аз беаҳамиятӣ ва надонистани оқибатҳои даҳшатбори он аз ҷониби худи ҷавонон ва волидони онҳост. Волидон бояд ҳаёти фарзандони хешро зери хатар нагузошта, аз имкониятҳое, ки имрӯз барои аз худ намудани илмҳои динӣ дар Тоҷикистон фароҳам оварда шудаанд, истифода баранд».
Раиси Кумита ҳамчунин бо волонтёрони Маркази ҷавонони ноҳия вохӯрӣ доир кард. Зимни вохӯрӣ волонтёрон ба фаъолияти васеътар даъват карда шуданд.
Пас аз вохӯрӣ бо волонтёрон масъулин аз ҷараёни сохтмони майдончаи варзишӣ ва толори варзишие, ки аз ҷониби Мақомоти иҷроияи ҳокимияти давлатии ноҳияи Бобоҷон Ғафуров сохта мешавад, дидан намуданд. Раиси Кумита ин иқдомро дар Соли ҷавонон ҳамчун туҳфаи хотирмон барои мардуми ноҳия маънидод намуд.