Баррасии беш аз 50 масъала дар Шӯрои Маҷлиси миллӣ

ДУШАНБЕ, 17.05.2017/АМИТ «Ховар»/. Беш аз 50 масъала дар ҷаласаи Шӯрои  Маҷлиси миллии Маҷлиси  Олии Ҷумҳурии Тоҷикистон, ки 17 май дар Душанбе баргузор гардид, баррасӣ шуданд.

Аз ҷумла,  аъзои Шӯро  лоиҳаи қарорҳои  Шӯрои Маҷлиси миллиро «Оид ба ворид намудани тағйиру иловаҳо  ба қонунҳои конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ», «Дар бораи интихоботи вакилон  ба маҷлисҳои маҳаллии вакилони халқ», «Дар бораи  Суди конститутсионии Ҷумҳурии Тоҷикистон» ва «Дар бораи мақомоти прокуратураи   Ҷумҳурии Тоҷикистон» баррасӣ карданд.          Ҳамзамон дар ҷаласаи Шӯрои палатаи болоии Парлумони Тоҷикистон  лоиҳаи қарорҳои Шӯрои  Маҷлиси миллӣ  «Дар бораи Кодекси тандурустии Ҷумҳурии Тоҷикистон», «Оид ба ворид намудани тағийру иловаҳо ба қонунҳои Ҷумҳурии Тоҷикистон «Дар бораи таҳсилоти миёнаи  касбӣ», «Дар бораи танзими анъана ва ҷашну маросимҳо дар Ҷумҳурии Тоҷикистон», Дар бораи иҷозатномадиҳӣ ба баъзе намудҳои фаъолият», «Дар бораи  ҳимоя ва дастгирии  давлатии соҳибкорӣ», «Дар бораи Палатаи ҳисоби Ҷумҳурии Тоҷикистон», тағйиру иловаҳо  ба кодексҳои андоз ва гумрук ва дар маҷмӯъ зиёда аз 50 масъала муҳокима гардиданд. Масъалаҳои баррасишуда марбут ба ҳаёти сиёсию иқтисодӣ ва иҷтимоию фарҳангии кишвар буда,   аз ҷониби раисони кумитаҳои Маҷлиси миллӣ баррасӣ гардиданд ва ҷиҳати ҷонибдорӣ  ба иҷлосияи даҳуми Маҷлиси миллии Маҷлиси Олии Ҷумҳурии Тоҷикистон,  ки фардо дар Душанбе баргузор мешавад, пешниҳод шуданд.