Дар мақомоти мубориза бо коррупсия чӣ гуна шахсон ба кор бояд қабул гарданд?

ДУШАНБЕ, 03/05/2017/АМИТ «Ховар»/. Дар Агентии назорати давлатии молиявӣ ва мубориза бо коррупсияи Ҷумҳурии Тоҷикистон минбаъд шахсоне ба кор қабул мегарданд, ки танҳо шаҳрвандии Ҷумҳурии Тоҷикистонро дошта бошанд. Дар ин росто 3 май вакилони палатаи поёнии Парлумони Тоҷикистон ба Қонуни Ҷумҳурии Тоҷикистон «Дар бораи Агентии назорати давлатии молиявӣ ва мубориза бо коррупсияи Ҷумҳурии Тоҷикистон» тағйиру иловаҳо ворид намуданд.
Сулаймон Султонзода, директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон зимни шарҳи масъалаи мазкур аз минбари Парлумон гуфт, ки лоиҳаи қонуни зикршуда бо мақсади пешбинӣ намудани маҳдудият дар хизмати давлатӣ дар Агентии назорати давлатии молиявӣ ва мубориза бо коррупсияи Ҷумҳурии Тоҷикистон бинобар соҳиб шудан ба шаҳрвандии давлати дигар ва мутобиқгардонии меъёрҳои Қонуни мазкур ба Конститутсияи Ҷумҳурии Тоҷикистон таҳия ва пешниҳод гардидааст.
Таъкид шуд, ки коррупсия дар ҷомеа аз зуҳуроти нангин ба шумор рафта, ба пешрафти ҷомеа ва амнияти он халал эҷод мекунад. Дар ин росто дар мубориза бо ин вабои аср дар мақомоти марбутаи муборизабаранда бо фасод бояд нафароне фаъолият намоянд, ки дасту дили пок дошта, дар самти хизмат ба Ватан, миллат ва ҳифзи арзишҳои давлатдорӣ дар шароити муосири ҷомеаи ҷаҳонӣ содиқ бошанд.