Хуҷанд: «Маданияти шаҳрдорӣ» мақомоти ҳифзи ҳуқуқ ва ҷомеаи шаҳрвандиро ба ҳам меоварад

ДУШАНБЕ, 01.05.2017. /АМИТ «Ховар»/. Дар толори «Маркази фарҳанг»-и шаҳри Хуҷанд бо иштироки намояндагони мақомоти ҳифзи ҳуқуқ-прокуратура, суд, амният ва фаъолон масъалаҳои вобаста ба пешгирии ҷинояткорӣ баррасӣ шуданд.
Тавре аз Вазорати корҳои дохилии Ҷумҳурии Тоҷикистон хабар доданд, дар вохӯрӣ сардори шуъбаи ВКД дар шаҳри Хуҷанд Эмин Ҷалилзода дар баробари тафсилоти вазъи кунунии криминогении маркази маъмурии вилояти Суғд аз тадбирҷӯиҳои мақомоти милитсия маълумот дода, зикр намуд, ки «ҳамкории мардум бо милитсия такягоҳи устуворест, ки муқобили тамоми зуҳуроти номатлуб, ҷинояткорӣ ва дигар ангезаҳои халалдоркунандаи амнияту тартибот истодагарӣ карда метавонад. Чунин таҷриба дар шаҳри Хуҷанд самаранок ба роҳ монда шудааст. Амалиёти «Маданияти шаҳрдорӣ» мақомоти ҳифзи ҳуқуқ ва ҷомеаи шаҳрвандиро ба ҳам оварда, ба тақвияти ҳамкории миёни онҳо мусоидат мекунад. Натиҷаи мусбати он коҳиш ёфтани ҷинояткорӣ аст, ки моро ҳавасманд месозад»,- зикр дошт Э. Ҷалилзода.