Мусобиқаи варзишӣ ба муносибати Соли ҷавонон ва 20-солагии Рӯзи ваҳдати миллии Тоҷикистон дар Афғонистон

ДУШАНБЕ, 29.05.2017 /АМИТ «Ховар»/. 25 майи соли 2017 аз ҷониби Консулгарии Ҷумҳурии Тоҷикистон дар вилояти Бадахшони Ҷумҳурии Исломии Афғонистон ба муносибати Соли ҷавонон ва 20-солагии Рӯзи Ваҳдати миллӣ бо ҳамкории Кумитаи варзишии муҷтамаъи ҷомеаи маданӣ ва мудирияти варзиши вилояти Бадахшони Афғонистон дар шаҳри Файзободи Ҷумҳурии Исломии Афғонистон байни наврасон мусобиқаи варзишӣ оид ба  каратэ баргузор гардид. Дар мусобиқа 100 нафар иштирок карданд.

Тавре аз Вазорати корҳои хориҷии Ҷумҳурии Тоҷикистон хабар доданд, дар мусобиқа барои шиносоии мардуми ҳавзаи консулӣ бо ҷашнҳои миллии мазкур намояндаи консулӣ сухан гуфт.

Мусобиқа  дар ВАО ба таври васеъ бозтоб ёфт. Ҳамзамон ба ТВ «Тулӯъ» ва радиои «Ому» низ дар ин маврид иттилоъ дода шуд. Ғолибони мусобиқа аз ҷониби муассисаи консулӣ бо ҷоизаҳо сарфароз гардонида шуданд.