Имзои Созишномаи сулҳ саҳифаи наверо дар рушди давлатдорӣ боз намуд

ДУШАНБЕ, 24.06.2017 /АМИТ «Ховар»/. «Маҳз бо устуворӣ ва иродаи матини Асосгузори сулҳу Ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 27 июни соли 1997 Созишномаи умумии истиқрори сулҳ ва ризоияти миллӣ имзо шуда, саҳифаи наверо дар таърихи давлатдории навини кишвар боз намуд»,-гуфт Вазири рушди иқтисод ва савдои Ҷумҳурии Тоҷикистон Неъматулло Ҳикматуллозода дар ҷаласаи тантанавӣ бахшида ба Рӯзи Ваҳдати  миллӣ.

Дар ҷаласа Вазири рушди иқтисод ва савдои ҷумҳурӣ  кормандонро ба ифтихори 20-умин солгарди Рӯзи Ваҳдати миллӣ ва иди саиди Фитр  табрик намуд. Таъкид кард, ки маҳз бо шарофати баимзорасии Созишномаи умумии истиқрори сулҳ ва ризоияти миллӣ дар Тоҷикистон,  ки дар натиҷаи он дар кишварамон сулҳу субот пойдор шуд, нишондиҳандаҳои макроиқтисодӣ рӯ ба афзоиш ниҳода, сатҳи некуаҳволӣ ва зиндагии шоистаи аҳолии кишвар таъмин гардид.

Дар ин бора аз Вазорати рушди иқтисод ва савдои Ҷумҳурии Тоҷикистон хабар доданд.