«Нест бод нашъамандӣ!»-эътирози ҷавонон зидди нашъамандӣ

ДУШАНБЕ, 21.06.2017 /АМИТ «Ховар»/. «Нест бод нашъамандӣ!»-таҳти чунин унвон дар майдони марказии шаҳри Сарбанди вилояти Хатлон гурӯҳи калони ҷавонону наврасон ва сокинони касбу кори гуногун бахшида ба Рӯзи байналмилалии мубориза бар зидди маводи нашъадор ҷамъ омада, эътирози худро алайҳи нашъамандӣ баён намуданд.

Дар ин бора ба хабарнигори АМИТ «Ховар» аз Мақомоти иҷроияи ҳокимияти давлатии вилояти Хатлон хабар доданд.

Бино ба иттилои манбаъ, дар қисмати аввали чорабинӣ доираи васеи ҷавонон аксияи иттилоотӣ бо номи «Ҷавонон-зидди нашъамандӣ»-ро доир намуданд, ки дар ҷараёни он ҷавонон дар бозору кӯчаҳои шаҳр варақаҳои гуногуни иттилоотӣ паҳн намуданд. Дар қисмати дуюми намоиши дастовардҳои муассисаҳои таълимӣ, расму шиорҳои даъватӣ ва маърӯзаву иншоҳои ба ин мавзӯъ бахшидаи хонандагон ба маъраз гузошта шуд. Дар қисми фарҳангии чорабинӣ бахши фарҳанг ва муассисаҳои таълимӣ саҳначаҳои ҳаҷвӣ ва барномаи консертӣ пешкаш намуданд.