Сокинони ноҳияи Тоҷикобод бо оби нӯшокӣ таъмин мегарданд

ТОҶИКОБОД, 24.06.2017 /АМИТ «Ховар»/. Дар ноҳияи Тоҷикобод дар асоси  супоришҳои  Пешвои миллат муҳтарам Эмомали Раҳмон ҷиҳати таъмин намудани сокинони ноҳия бо оби нӯшокӣ, ки зимни сафари кориашон  ба ноҳияҳои Сангвор, Нуробод, Тоҷикобод, Лахш, Рашт ва деҳоти Сағирдашти ноҳияи Дарвози ВМКБ дода буданд, корҳои сохтмонии хатҳои оби нӯшокии деҳаи Файзбори  ҷамоати деҳоти Нушор дар масофаи 12 километр бо маблағи 684 ҳазор 800 сомонӣ ва деҳаҳои Кӯҳдоман ва Себистони ҷамоати деҳоти Ширинчашма, деҳаи Гулистони ҷамоати деҳоти Шоҳ Гадоев, деҳаҳои Қалъа ва Фатҳободи ҷамоати деҳоти Лаби об дар масофаи 2300 метр, деҳаи Ширинчашмаи  ҷамоати деҳоти Ширинчашма дар масофаи 6000 метр бо маблағи 250 ҳазор сомонӣ идома дошта, як қисми онҳо дар рӯзҳои таҷлили иди Ваҳдати миллӣ мавриди истифода қарор мегиранд.

Раиси дастгоҳи Мақомоти иҷроияи ҳокимияти давлатии ноҳияи Тоҷикобод Тоир Устоев иброз намуд, ки қисми зиёди корҳои сохтмонии хатҳои оби нӯшокӣ тариқи ҳашари сокинон ҷараён дошта, дар рафти корҳои сохтмонӣ ҳолатҳои гузаронидани зимистони тӯлонии минақа ба назар гирифта мешаванд.