Тоҷикистон бори нахуст зинаи аввали Ҷоми гӯштини камарбандии ҷаҳонро ишғол намуд

ДУШАНБЕ, 9.06.2017 /АМИТ «Ховар»/. Дар мусобиқаи Ҷоми ҷаҳон дар шаҳри Оренбурги Россия дастаи мунтахаби гӯштини камарбандӣ (кураш)-и Тоҷикистон зинаи аввалро ишғол намуда, аз рӯи натиҷаҳои мусобиқа 54 имтиёз ба даст овард. Дар ин бора аз Федератсияи гӯштини камарбандии Тоҷикистон иттилоъ доданд.

Бояд зикр кард, ки ду  варзишгари тоҷик — Муҳаммадғуфрон Тошзода дар вазни то 68 кило ва Достон Почоев дар вазни то 90 кило ба дарёфти медалҳои тиллои мусобиқа шарафёб гардиданд.

Чор варзишгари дигари тоҷик — Самандар Эрназаров (вазни беш аз 100 кг), Абдураҳмон Маматқулов (то 100 кг), Рӯзибой Сафаров (то 82 кг) ва Абӯэҳсон Ашӯрзода (то 75 кг)  бо медалҳои биринҷӣ  сарфароз гаштанд.

Тавре раиси Федератсияи гӯштини камарбандии Тоҷикистон Анвар Қосимов хабар дод, ҳайати мунтахаби Тоҷикистон аз 8 варзишгар, мураббӣ ва ду довар иборат буд. «Дар ҳисоби умумидаставӣ Тоҷикистон бори нахуст дар таърихи худ зинаи аввали Ҷоми гӯштини камарбандии ҷаҳонро ишғол намуд», -иброз дошт ӯ.

Акнун варзишгарони мо ба ду мусобиқаи пурнуфузи дигар — Чемпионати ҷаҳон, ки моҳи июл дар Қазоқистон доир мегардад ва Бозиҳои 5-уми Осиё дар биноҳо (17-27 сентябр) омодагӣ мегиранд».