Роҳбарияти Бонки миллии Тоҷикистон ва Агентии беҳдошти замин ва объёрӣ оид ба ҷамъбасти нимсолаи аввал рӯзи душанбе нишасти матбуотӣ баргузор мекунанд

ДУШАНБЕ, 22.07.2017 /АМИТ «Ховар»/. 24 июли соли 2017 мутобиқи нақшаи таҳиягардида нишасти матбуотии Бонки миллии Тоҷикистон, Агентии беҳдошти замин ва объёрии назди Ҳукумати Ҷумҳурии Тоҷикистон ва Донишкадаи давлатии санъати тасвирӣ ва дизайни Тоҷикистон гузаронида мешаванд.
Нишасти матбуотии Бонки миллии Тоҷикистон соати 9:00 дар маҷлисгоҳи бинои кӯҳнаи Бонки миллӣ, воқеъ дар хиёбони Рӯдакӣ, 23/2 (рӯ ба рӯи Театри давлатии академии опера ва балети ба номи Садриддин Айнӣ) таъйин шудааст.
Нишасти матбуотии Агентии беҳдошти замин ва объёрии назди Ҳукумати Ҷумҳурии Тоҷикистон 24 июл, соати 11:00 дар толори Маркази матбуоти ҷумҳуриявии «Ховар» (ш. Душанбе, хиёбони Рӯдакӣ, 40) баргузор мешавад.
Роҳбарият ва ҳайати омӯзгорони Донишкадаи давлатии санъати тасвирӣ ва дизайни Тоҷикистон журналистонро ҷиҳати иштирок дар нишасти матбуотӣ вобаста ба натиҷаҳои нимсолаи аввали соли 2017 ба бинои Донишкадаи мазкур рӯзи 24 июл, соати 8:00 субҳ даъват кардааст. Дар назар дошта шудааст, ки дар вақти баргузории нишасти матбуотӣ ба нахустин хатмкунандагони Донишкадаи давлатии санъати тасвирӣ ва дизайни Тоҷикистон дипломҳои тахассусӣ супорида мешаванд.
Хотиррасон мешавем, ки мутобиқи Амри Президенти Ҷумҳурии Тоҷикистон аз 15 сентябри соли 2011 №АП-1729 вазорату идораҳо ва ташкилоту муассисаҳои мамлакат баъд аз ҷамъбасти натиҷаҳои фаъолияти шашмоҳа ва солона ҳар сол ду маротиба нишастҳои матбуотӣ баргузор карда, ба саволҳои намояндагони ВАО посух медиҳанд.