Агентии назорати давлатии молиявӣ ва мубориза бо коррупсия аз боздошти котиби коллегияи судии Суди шаҳри Душанбе хабар дод

ДУШАНБЕ, 13.11.2017 /АМИТ «Ховар»/. Агентии назорати давлатии молиявӣ ва мубориза бо коррупсияи Ҷумҳурии Тоҷикистон ба хабарнигори АМИТ «Ховар» аз боздошти котиби коллегияи судии Суди шаҳри Душанбе Баҳром Кенҷаев хабар дод.

Ба иттилои манбаъ, номбурда бо роҳи фиреб ва суиистифодаи боварӣ аз шаҳрванд «А» барои ба фоидаи охирин ҳал намудани баҳси граждании манзили истиқоматӣ 4000 доллари ИМА талаб намудааст.
«Баҳром Кенҷаев зимни аз шаҳрванд «А» гирифтани 4000 доллари ИМА дар шаҳри Душанбе дастгир гардида, маблағи мазкур аз ӯ ҳамчун далели шайъӣ ёфта, гирифта шуд»,-илова намуд манбаъ.

Дар айни замон нисбат ба Баҳром Кенҷаев бо моддаи 247 қисми 4 банди «б» КҶ Ҷумҳурии Тоҷикистон парвандаи ҷиноятӣ оғоз карда шуда, тафтишоти пешакии он идома дорад.