“НАҚШИ ПЕШВОИ МИЛЛАТ ДАР РУШДИ БАХШИ САЙЁҲӢ”. Дар Кумитаи рушди сайёҳии назди Ҳукумати ҶТ ҷамъомад доир гардид

ДУШАНБЕ, 17.11.2017 /АМИТ «Ховар»/. Хизматҳои шоёни Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар раванди тағйироти нави бунёдкориву созандагӣ, аз ҷумла, бунёди неругоҳҳои барқӣ, кушодану васли роҳу нақбҳо, бедору ғанӣ гардонидани ифтихори миллӣ, вусъат бахшидан ба вазъи таълиму тарбия, тандурустӣ ва сайёҳӣ ҷойгоҳи махсус дорад. Ин матлаб зимни ҷамъомаде бахшида ба Рӯзи Президенти Тоҷикистон таҳти  унвони «Нақши Пешвои миллат дар рушди бахши сайёҳӣ» баён гардид. Дар он коршиносони соҳа, роҳбарони ширкатҳои сайёҳии ватанӣ, устодон ва донишҷӯёни риштаи сайёҳии мактабҳои олии кишвар иштирок доштанд.

Раиси Кумитаи рушди сайёҳии назди Ҳукумати Ҷумҳурии Тоҷикистон Нуъмон Абдуғаффорзода зикр кард, ки Асосгузори сулҳу ваҳдати миллӣ — Пешвои миллат рамзи пойдориву бардавомии давлатдории мустақили тоҷикон, сулҳу ваҳдати миллӣ, кафили рушди босубот ва устувори ҷомеаи Тоҷикистон мебошад.

Дар баробари ин, Президенти кишвар бо пешниҳоду ташаббусҳои байналмилалӣ дар сатҳи ҷаҳонӣ мақоми хосса дошта, ин маҳбубият на танҳо боиси боварию эътиқоди мардуми Тоҷикистон, балки ифтихори тамоми тоҷикони ҷаҳон аст.

Мавриди тазаккур аст, ки маҳз бо талошҳои созанда ва пайгиронаи  Президенти Ҷумҳурии Тоҷикистон муҳтарам Эмомалӣ Раҳмон дар заминаи сиёсати «дарҳои боз» Ҷумҳурии Тоҷикистон аз соли 2007 узви комилҳуқуқи Созмони ҷаҳонии сайёҳӣ гашта, барои ворид шудани соҳаи мазкур ба бозори ҷаҳонии сайёҳӣ заминаҳои воқеӣ фароҳам оварда шудаанд.