СИРКИ ӮЗБЕКИСТОН БА ДУШАНБЕ МЕОЯД! Ҳайати сирки кишвари ҳамсоя бо худ ҳайвонҳои гуногуни ромшударо меорад

ДУШАНБЕ, 27.12.2017. /АМИТ «Ховар»/. Ҳунармандони Сирки Ӯзбекистон бо сафари ҳунарӣ ба Душанбе меоянд. Ҳайати Сирки Тошканд бо худ ҳайвонҳои гуногуни ромшуда маймунҳо, сагҳо, ламаҳо ва аспчаҳоро (понҳо) меорад. Ҳайат аз 15 нафар иборат буда, бояд имрӯз ба пойтахти Тоҷикистон ворид шавад. Дар ин бора «АП» бо истинод ба Сирки давлатии Душанбе хабар медиҳад.

Бино ба иттилои манбаъ, намоиши нахустини ҳунармандони Сирки Тошканд санаи 31 декабр (соати 14:00) дар толори Сирки давлатии Душанбе баргузор мешавад. Меҳмонон танҳо дар пойтахти Тоҷикистон ҳунарнамойӣ мекунанд. Сафари ҳунарии сирки Ӯзбекистон муддати як моҳ ба нақша гирифта шуда, арзиши билет аз 30 то 80 сомонӣ мебошад. Барои кӯдакони синни то 3-сола тамошои барнома бепул аст.

Сафари ҳунарии сирки Тошканд дар чаҳорчӯби ҳамкориҳои фарҳангӣ ва гуманитарии Тоҷикистону Ӯзбекистон сурат мегирад.

Барои маълумоти иловагӣ метавонед ба телефони 937441111 муроҷиат намоед.