«Чилдухтарон» сайёҳонро ба ваҷд меорад

МУЪМИНОБОД, 27.01.2018 /АМИТ «Ховар»/. Президенти Ҷумҳурии Тоҷикистон муҳтарам Эмомалӣ Раҳмон дар Паёми солонаи хеш ба Маҷлиси Олии мамлакат соли 2018-ро Соли рушди сайёҳӣ ва ҳунарҳои мардумӣ эълон карданд. Бо дастгирӣ аз ин пешниҳод сокинон ва масъулин дар тамоми шаҳру ноҳияҳо барои муҳайё намудани шароити рушди соҳа камари ҳиммат бастаанд.

Дар ноҳияи Муъминобод мавзеъҳои таърихӣ хеле зиёд буда, яке аз онҳо мавзеи «Чилдухтарон» мебошад, ки оид ба он дар  сарчашмаҳои таърихӣ маълумот мавҷуд аст. Сол то сол рафту омади сайёҳони дохилию хориҷӣ ба ин мавзеъ афзоиш меёбад. Сайёҳоне, ки ҳамасола аз ин мавзеъ дидан мекунанд, аз табиати дилфиреб ва ҳунармандии сокинони ноҳия завқ мебаранд. Мақомоти иҷроияи ҳокимияти давлатии ноҳия бо дастгирии Ҳукумати Ҷумҳурии Тоҷикистон ва соҳибкорон барои муҳайё намудани шароит баҳри рушди соҳаи сайёҳӣ роҳро то мавзеи Чилдухтарон сангфарш карда, дар ин ҷо пул бунёд намудааст.

Бояд гуфт, ки дар ноҳияи Муъминобод давоми асрҳо ҳунарҳои мардумӣ ташаккул ёфта, аз насл ба насл гузаштаанд. Ҳамин аст, ки бо фароҳам гардидани шароит дар ноҳия хатсайрҳо муайян гардида, барои сайёҳон дӯконҳои фурӯши армуғон ва меҳмонхонаҳо сохта мешаванд. Ин иқдом, бешак, барои афзоиш ёфтани шумораи сайёҳон мусоидат хоҳад кард.