Дар Новокузнетск ба ифтихори Cоли рушди сайёҳӣ ва ҳунарҳои мардумӣ гӯшаи «Фарҳанги миллии тоҷикон» ташкил карданд

НОВОКУЗНЕТСК, 13.01.2018 /АМИТ «Ховар»/. Бо пешниҳоди Пешвои миллат муҳтарам Эмомалӣ Раҳмон соли 2018 Cоли рушди сайёҳӣ ва ҳунарҳои мардумӣ эълон гардид. Ин пешниҳодро нахустин шуда, дар минтақаи Сибири Федератсияи Россия Ҷамъияти минтақавии «Дӯстии тоҷику рус»-и шаҳри Новокузнетск, ки ба он ҷавонмардони ватандӯст Шавкатҷон Тоҳиров ва Раҳмоналӣ Одинаев сарварӣ мекунанд, ҳамроҳ бо аъзои фаъоли ҷамъияти тоҷикон Амирҷон Ризоев, Имомиддин Сониев, Маҳмадкарим Абдураҳимов ва Дилшоди Рамазонӣ якдилона ҷонибдорӣ намуданд.

Бо ташаббуси ҷамъият дар толори васеи Осорхонаи таърихӣ-кишваршиносии ба номи В. Маяковскийи шаҳр гӯшаи «Фарҳанги миллии тоҷикон» таъсис дода шуд, ки ин бори дигар аз хештаншиносию ифтихормандии ҳамватанонамон дарак медиҳад. Либосҳои миллӣ, асбобҳои мусиқӣ, найқаламу воситаҳои нахустини навиштани хату китобҳои дар чарму пӯсти дарахт навишташуда, гаҳвораю танӯри нонпазӣ ва даҳҳо нигораҳои гӯшаи фарҳангиро аллакай садҳо бошандагони шаҳру вилояти Кемерово тамошо карда, бори дигар дар бораи тоҷикон- ин миллати ватандору ободгар ва дорои адабиёти қадимибуда маълумот пайдо намуданд.

Тавре зимни суҳбат бо мо Шавкатҷон Тоҳиров иброз дошт, «маҳз тавассути муаррифии фарҳангу осори адибонамон мо метавонем миёни дигар миллатҳо мавқеъ пайдо кунем. «Фарҳанг ҳастии миллат аст» — ин гуфтаи Пешвои миллатро мо дар ҳама вохӯриҳо ба ҳамватанонамон таъкид карда, кӯшиш мекунем тавассути ифтитоҳи чунин осорхонаву барномаҳои миллӣ дар замири насли ҷавон ва кулли ҳамватаноне, ки инҷо зиндагӣ мекунанд, муҳаббат ба ватани таърихиву суннатҳои аҷдодиро дар ҳамбастагӣ бо эҳтирому ҳифзи забону суннатҳои аҷдодӣ бедор намоем».

Садбарг БОҚИЕВА,
мухбири махсуси АМИТ «Ховар»
дар Новокузнетск, ФР