Дар шаҳри Гулистон фарқияти содироти маҳсулоти истеҳсолӣ аз воридотӣ 2,7 маротиба афзудааст

ХУҶАНД, 01.02.2018. /АМИТ «Ховар»/.   Дар давоми соли 2017 ба соҳаи саноати шаҳри Гулистон 605,4 миллион сомонӣ сармоя ҷалб гардид, ки аз он 578,5 миллион сомонӣ сармояи хориҷӣ ва 26,8 миллион сомониаш сармояи дохилӣ мебошад.  Ҳамчунин гардиши савдои хориҷии коргоҳҳои саноатии шаҳр дар ин давра 313,9 миллион доллари ИМА-ро ташкил дода, фарқияти содирот аз воридот 2,7 маротиба зиёд гардидааст. Дар ин радиф, вазни қиёсии корхонаҳои саноатӣ дар ҳаҷми истеҳсоли маҳсулоти саноатии вилоят 35,7 фоизро ташкил дод. Дар ин бора раиси шаҳри барқчиёни вилояти Суғд – шаҳри Гулистон Матлубахон Сатториён зимни нишасти хабарӣ ба намояндагони воситаҳои ахбори омма маълумот дод.

Ба иттилои хабарнигори минтақавии АМИТ «Ховар», шаҳрдори Гулистон иброз дошт, ки дар ин давра аз ҷониби корхонаҳои саноатӣ бо 23 кишвари ҷаҳон робитаи тиҷоратӣ ба роҳ монда шуда, ҳаҷми маҳсулоти содиротӣ ба кишварҳои  хориҷӣ 228,2 миллион доллар ва воридот 85,7 миллион долларро ташкил дод.

Инчунин аз 26 корхонаи саноатии шаҳр 18-тои он ҳаҷми истеҳсоли маҳсулотро афзоиш дода, 11,6 маротиба зиёд намуданд. Дар ин давра истеҳсоли барзиёди маҳсулоти саноатӣ аз рӯи 93 намуди аслӣ ба роҳ монда шуд. Дар  маҷмӯъ, корхонаҳои саноатии шаҳри Гулистон соли 2017 ба маблағи беш аз 3,5 миллиард сомонӣ маҳсулот истеҳсол намуданд,  ки ин нишондиҳанда  114,8 фоизро ташкил дод.

Ҳамчунин вобаста ба паҳлуҳои дигари иҷтимоӣ-иқтисодии шаҳр Матлубахон Сатториён баён дошт, ки дар давраи ҳисоботӣ дар миқёси шаҳракҳо ва шаҳри Гулистон 29 иншооти истеҳсолию коммуналӣ ва манзилӣ ба истифода дода шуд, 8,0 км роҳҳси мошингард таъмири асосӣ, 21,5 км таъмири ҷорӣ, 31 км шағалпӯш карда шуданд. Дар самти таъминоти аҳолӣ бо оби нӯшокӣ 9 насоси обкашии зеризаминӣ таъмир ва 3 адад нав карда шуда, 90 бинои бисёрошёнаи истиқоматии шаҳр ба хатти нави оби нӯшокӣ пайваст гардиданд.

Дар самти эҳёи ҳунарҳои миллӣ ва касбомӯзӣ дар  ҳудуди шаҳр ва шаҳракҳо  7 маркази таълимӣ-касбомӯзии атласу адрасбофӣ таъсис дода шуда, онҳо бо 14 дастгоҳи атласу адрасбофӣ, 6 дастгоҳи қолинбофӣ ва 6 мошинаи дарздӯзӣ таъмин гардиданд. Баъди омӯзиш дар ин марказҳо 206 нафар занону духтарони хонанишин соҳиби шаҳодатнома шуданд.