ФУТЗАЛ: имрӯз бозии дастаи мунтахаби Тоҷикистон бо дастаи Кореяи Ҷанубӣ доир мегардад

ДУШАНБЕ, 05.02.2018 /АМИТ «Ховар»/. Дастаи  мунтахаби Тоҷикистон оид ба футзал дар бозиҳои гурӯҳии Чемпионати Осиё-2018 имконияташро барои баромадан ба даври навбатӣ аз даст дод.

Тавре аз Федератсияи футболи Тоҷикистон ба  хабарнигори  АМИТ «Ховар» иттилоъ доданд, дар бозии дуюми гурӯҳӣ футзалбозони мо аз дастаи  мунтахаби Ӯзбекистон бо ҳисоби 4:2 мағлуб шуданд. Голҳоро аз ҳайати мунтахаби мо Умед Кузиев ва Дилшод Саломов ба ҳадаф расониданд. Дастаи  мунтахаби Ӯзбекистон то ҳол ягона дастае мебошад, ки роҳхати даври ¼-финалии Чемпионати Осиё-2018-ро соҳиб гардидааст.

Ёдовар мешавем, ки дастаи мунтахаби Тоҷикистон шомили гурӯҳи «В» мебошад, ки ба гурӯҳи мазкур дастаҳои мунтахаби қавии Осиё, аз ҷумла, Япония, Ӯзбекистон ва Кореяи Ҷанубӣ шомиланд. Дастаи  Япония дар рейтинг ё худ раддабандии мамлакатҳои Осиё дар зинаи дуюм ва  дастаи  мунтахаби  Ӯзбекистон дар зинаи чорум қарор доранд.

Хотиррасон менамоем, ки дар бозиҳои гурӯҳии муқаддамотӣ дастаи мунтахаби Тоҷикистон  5  феврал бо дастаи мунтахаби Кореяи Ҷанубӣ дидор анҷом медиҳад. Оғози бозӣ соати 13:30 ба вақти Душанбе дар назар аст.