Мутахассисони соҳаи тиб дар Ҷумҳурии Тоҷикистон табобат ва пешгирии бемории силро муайян мекунанд

ДУШАНБЕ, 21.02.2018 /АМИТ «Ховар»/.     Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар якҷоягӣ бо  Оҷонсии Иёлоти Муттаҳидаи Амрико оид ба рушди байналмилалӣ (USAID) 22-23 феврали соли равон дар меҳмонхонаи «Серена»-и шаҳри Душанбе дар мавзӯи «Усули ба бемор равонагардидаи табобати бемории сил дар Ҷумҳурии Тоҷикистон» семинари ҷумҳуриявӣ баргузор   менамояд.

Тавре аз Вазорати мазкур хабар доданд, дар семинар  қариб 100 нафар силшиносон, сиёсатмадорон ва мутахассисони соҳаи тандурустӣ, намояндагони Ҳукумати Ҷумҳурии Тоҷикистон, USAID, Ташкилоти Умумиҷаҳонии Тандурустӣ (ТУТ), намояндагони созмонҳои байналмилалӣ ва ташкилотҳои ҷамъиятӣ дар мавзӯи мазкур мубодилаи афкор намуда, таҷриба, дастовард ва сабақҳои гирифтаро дар самти мубориза бар зидди бемории сил ва усулҳои ба бемор равонагардида баррасӣ мекунанд.

Иштирокчиёни семинар ҳамчунин маҷмӯи чорабиниҳои афзалиятноки таъмини дастгирии устувор, ҳамоҳангсозӣ ва татбиқи усулҳои ба бемор равонагардидаро дар ташхис, табобат ва пешгирии бемории сил дар Ҷумҳурии Тоҷикистон муайян мекунанд.