Натиҷаҳои фаъолияти Комиссия оид ба ҳуқуқи кӯдаки шаҳри Душанбе дар соли 2017 ҷамъбаст гардиданд

ДУШАНБЕ, 08.02.2018 /АМИТ «Ховар»/. Дар мақомоти иҷроияи ҳокимияти давлатии шаҳри Душанбе  оид ба натиҷаҳои ҷамъбасти фаъолияти Комиссия оид ба ҳуқуқи кӯдаки шаҳри Душанбе   дар соли 2017 ҳамоиш доир  гардид.

Тавре сардори Раёсати иттилоот ва робитаи хориҷии дастгоҳи Раиси шаҳри Душанбе  Абдумаҷид  Ҳакимзода   ба хабарнигори АМИТ «Ховар»  иброз дошт,   ҳамоиш  таҳти раёсати раиси комиссия, муовини Раиси шаҳри Душанбе Мавсума Муинӣ  сурат гирифт.

Мавсума Муинӣ  зимни пешниҳоди ҳисобот оид ба фаъолияти  Комиссия оид ба ҳуқуқи кӯдаки  шаҳри Душанбе дар  соли сипаригардида,   аз ҷумла,  зикр намуд, ки комиссия дар ин давра масъалаҳои марбут ба ҷойгир намудани кӯдакон ба мактаб-интернатҳо, хонаи кӯдакон, фарзандхонӣ, коҳиш додани сатҳи ҷинояткорӣ, ҳуқуқвайронкунӣ миёни ноболиғон ва дигар мушкилоти ҷойдоштаро матраҳ  ва ҳал кардааст.

«Дар ин давра ба унвони Комиссия 605 ариза ва 221 мактуб ворид гардида, аз ин шумора 495 муроҷиатро мавзӯоти марбут ба ҷойгир намудани кӯдакон ба мактаб-интернатҳо ва хонаи кӯдакон ташкил медиҳанд», —  афзуд  раиси Комиссия.

Дар ҳамоиш ҳамчунин таъкид шуд, ки  бо ибтикори Комиссия Рӯзи байналмилалии ҳифзи кӯдакон дар Муассисаи давлатии фарҳангиву фароғатии «Аҳорун» бо иштироки беш аз 1400 нафар кӯдакону наврасон, аз ҷумла, тарбиятгирандагони мактаб — интернатҳо, хонаи кӯдакони синни томактабӣ, тарбиятгирандагони боғча-  кӯдакистонҳо, ғолибони олимпиадаҳои ҷумҳуриявӣ таҷлил гардид.

Ҷиҳати ҳавасмандгардонӣ барои кӯдакони ятиму бепарастор, аз оилаҳои ниёзманд,  ғолибони олимпиадаҳои фаннии шаҳрӣ, ҷумҳуриявӣ ва байналмилалӣ  намоишномаи солинавии кӯдакона таҳти унвони  «Шаҳри афсонаҳо» ташкил гардид, ки 1840 нафар  иштирокчии  он бо туҳфаҳои хотиравӣ қадрдонӣ шуданд.

Ба иттилои масъулин,   соли 2017 аз ҷониби аъзои комиссия  бо мақсади пешгирӣ намудани ноболиғон аз ҳуқуқвайронкуниву    ҷинояткорӣ дар муассисаҳои таълимии пойтахт 122 вохӯриву         суҳбатҳо       ташкил   гардиданд.

Инчунин дар ҳамкорӣ бо масъулини      хадамоти пешгирии Вазорати корҳои дохилии чор ноҳияи шаҳри   Душанбе 1344 амалиёти муштарак гузаронида шуда, дар натиҷа      5556 нафар ноболиғоне, ки ба оворагардӣ, мошиншӯӣ, талбандагӣ, савдои кӯчагӣ ва ғайра машғул буданд, ошкор гардиданд.

«Ҳифзи ҳуқуқу манфиатҳои кӯдак, беҳдошти вазъи зиндагӣ, таълим ва тарбияи ноболиғони шаҳр ва ноҳияҳои он минбаъд низ таҳти назорати доимӣ қарор гирифта, ҷиҳати иҷрои босамари ваколату салоҳияти худ Комиссия оид ба ҳуқуқи кӯдаки шаҳри Душанбе тадбирҳои зарурӣ роҳандозӣ менамояд», -гуфта шуд дар ҳамоиш.