Нусратулло Давлатзода: «Як сабаби таъмин нагардидани нишондиҳандаҳои андоз пурра фаъолият накардани баъзе корхонаҳои калони саноатию хизматрасонӣ буд»

ДУШАНБЕ, 08.02.2018. /АМИТ «Ховар»/. Соли 2017 нақшаи тасдиқшудаи андозҳо ва дигар пардохтҳои ҳатмӣ, ки ҷамъоварии онҳо ба зиммаи мақомоти андоз гузошта шудааст, ба андозаи 102,8% таъмин гардид. Ба ҷои 9 млрд. 318 млн. сомонии пешбинишуда ба буҷет 9 млрд 575,4 млн. сомонӣ ворид карда шуд, ки нисбат ба нишондиҳандаҳои пешбинишуда 257, 4 млн. сомонӣ зиёд аст. Ин маълумотро имрӯз зимни нишасти матбуотӣ раиси Кумитаи андози назди Ҳукумати Ҷумҳурии Тоҷикистон Нусратулло Давлатзода ба хабарнигорони воситаҳои ахбори омма пешниҳод намуд.

Тибқи маълумот, инчунин дар ин давра иҷрои нақшаи андоз аз арзиши иловашуда 91,8 % ва андози иҷтимоӣ аз ҳисоби корхонаҳои ғайрибуҷетӣ 97,2 % таъмин гардид.

Сабабҳои асосии таъмин нагардидани нишондиҳандаҳо доир ба андозҳои мазкурро раиси Кумитаи андоз Нусратулло Давлатзода дар кам шудани манбаъҳои андозбандии онҳо ва дар баробари ин зиёд гардидани ҳиссаи амалиёти аз андозбандӣ озод ва амалиёти бо меъёри пасткардашудаи 5-фоизаи андоз аз арзиши иловашуда андозбандишаванда дар баъзе соҳаҳо, инчунин дуруст ва пурра фаъолият накардани баъзе корхонаҳои калони саноатию хизматрасонӣ ва то ҳадди пешбинишуда афзоиш наёфтани шумораи коргарон ва музди меҳнати коргарони кироя вобаста донист.