Парлумони Тоҷикистон Шартномаи шарикии стратегии байни Тоҷикистон ва Туркманистонро баррасӣ намуд

ДУШАНБЕ, 26.02.2018 /АМИТ «Ховар»/. Шартнома дар бораи шарикии стратегӣ байни Ҷумҳурии Тоҷикистон ва Туркманистон 26 феврал дар ҷаласаи Шӯрои Маҷлиси намояндагон таҳти раёсати Раиси палатаи поёнии Парлумони мамлакат Шукурҷон Зуҳуров баррасӣ шуд.

Раиси кумитаи Маҷлиси намояндагон  оид ба корҳои байналмилалӣ, иттиҳодияҳои ҷамъиятӣ ва иттилоот Олимҷон Салимзода масъалаи мазкурро дар назди вакилон тавзеҳ дод. Зикр шуд, ки ин санад  бо назардошти умумияти таърихию фарҳангии халқҳои Тоҷикистон ва Туркманистон ва бар асоси эътирофи тарафайну эҳтироми ҳуқуқҳои истиқлолияти ҳар як давлат дар амалӣ намудани сиёсати хориҷӣ ба имзо расонида шудааст. Санади мазкур  ба таҳкими иқтидори ҳамкории Тоҷикистону Туркманистон мусоидат менамояд.

Дар ҷаласа таъкид шуд,  ки бо розигии мутақобила Тарафҳо метавонанд ба Шартнома тағйиру иловаҳо ворид намоянд. Тарафҳо мақоми бетарафии доимии Туркманистон ва сиёсати хориҷии Ҷумҳурии Тоҷикистонро эҳтирому дастгирӣ намуда, эътимоди муштарак ва ҳамкории мутақобили стратегиро дар соҳаи  сиёсати байналмилалӣ ҳамаҷониба таҳким мебахшанд.

Мавриди зикр аст, ки санади мазкур зимни сафари расмии Президенти Туркманистон Гурбонгулӣ Бердимуҳаммедов ба Ҷумҳурии Тоҷикистон,  ки моҳи ноябри соли 2017 сурат гирифта буд, ба имзо расонида шудааст.